المصريين كلهم فاكرين ان الطفل المصرى اذكى طفل فى العالم,طيب بامارة ايه والنبي مانتوا شايفين العيال واللي بتعمله وبعدين فى حقيقة علمية بتقول ان الاطفال كلهم بيتولدوا بنسبة ذكاء واحدة واللي بيفرق بعد كده هو وزن الطفل وحجم راسه بمعنى ان زيادة وزن الطفل بنسبة 40% وزيادة حجم رأسه خلال الشهر الاول بعد ولادته بتساهم فى زيادة نسبة الذكاء عنده بنسبة 1.6 لما بيوصل لسن 6 سنين وهكذا يعني لو وزنه زاد 50% فى اول شهر تزيد نسبة ذكائه بنسبة 1.8, هاتلي عيل فى مصر كلها بيزيد 40% من وزنه فى اول شهر.

وبيقولك كمان ايه ان احنا كمصريين يعني احفاد الفراعنة والحقيقة ان مصر بعد الفتح الاسلامي بقيادة “عمرو بن العاص” اقبل عليها ناس كتير جدا من شبه الجزيرة العربية واتمركزوا فيها وخصوصا فى الصعيد واتجوزوا وخلفوا ده غير الاقباط اللي كانوا موجودين قبل الفتح الاسلامي واللي كان معظمهم احفاد الرومان اللي كانوا عايشين فى مصر وقتها,يعني موضوع ان الفراعنة اجدادنا ده فاكس جدا واتحدى اي حد يجيبلي واحد بس فى شجرة عيلته فرعوني.

جامدة اوي حتة “لو شربت من مياه النيل لازم ترجعلها تاني” كدبة كلنا فى مصر مصدقينها مع انك لو فكرت شوية وبحثت وعرفت كام واحد هاجر من مصر ومارجعش تاني هاتعرف ان دي اشاعة مش اكتر.

“مصر يا عبلة” جملة محمود يس الشهيرة فى فيلم الصعود الى الهاوية ده غير بقى رأفت الهجان ودموع فى عيون وقحة واعدام ميت وغيرهم من الافلام والمسلسلات وطبعا رويات “رجل المستحيل” اللي كلنا اتربينا عليها واللي بتبين لك ان جهاز المخابرات المصرى اقوى جهاز مخابرات فى العالم والحقيقة انه جهاز مخابرات قوى جدا مفيش كلام لكنه مش جهاز اسطورى بالعكس هو جهاز مخابرات طبيعي زي ماليه نجاحات ليه اخفاقات عادي يعني.

معتقد سائد جدا فى مصر وهو انك ماتحاولش تفكر فى الحاجة اللي انت خايف تحصلك كتير لاتحصلك فعلا إعمالا للمثل المشهور “اللي يخاف من العفريت يطلعله” والحقيقة غير كده طبعا وكفاية اننا نعرف الاية الكريمة اللي بتقول “قل لن يصيبنا الا ماكتب الله لنا”.